Development in the womb

མངལ་དུ་ལུས་རིམ་གྱིས་འཕེལ་ཚུལ་ནི།
མངལ་དེ་ནི་མའི་ཕོ་བའི་འོག་ལོང་གའི་སྟེང་གི་བར་དེར་ཡོད་པར་མངལ་འཇུག་པས་བཤད་དོ། །དེ་ལ་དང་པོར་མེར་མེར་པོ་ནི། ཕྱི་འོ་མ་སྐོལ་བའི་སྤྲིས་མ་ལྟ་བུས་གཡོགས་པ་ལ་ནང་ཤིན་ཏུ་སླ་བའོ། །དེ་ནས་བཟུང་སྟེ་ཕུང་པོ་རགས་པ་གྲུབ་པ་ཡིན་པས་འཆི་བ་ལ་ཐུག་གི་བར་གྱི་ལུས་ཕྲ་རགས་རྣམས་འབྱུང་བ་བཞིའི་ཁམས་ལས་གྲུབ་པ་ཡིན་པས། ས་རླུང་གིས་འཛིན་པར་བྱེད། ཆུ་རླུང་གིས་སྡུད་པར་བྱེད། །མེ་རླུང་གིས་མ་རུལ་ཅིང་སྨིན་པར་བྱེད། རླུང་རླུང་གིས་རྒྱས་པར་བྱེད་དོ། །མེར་མེར་པོ་ཞག་བདུན་སོང་བ་ན་རླུང་གསར་པ་སྐྱེ་སྟེ་རླུང་གིས་སྨིན་པར་བྱས་པ་ལས་ལྟར་ལྟར་པོ་ནི་ཕྱི་ནང་གཉིས་ཀ་ཞོ་ལྟར་སྐ་ལ་ཤར་མ་གྱུར་པའོ། །དེ་ཞག་བདུན་སོང་བ་ན་དེ་ནས་ཡང་རླུང་གསར་པ་སྐྱེ་སྟེ་སྨིན་པར་བྱས་པ་ལས་གོར་གོར་པོ་ནི་ཤར་ནི་གྱུར་ལ་མནན་མི་བཟོད་པའོ། །
དེ་ཞག་བདུན་སོང་བ་ན་རླུང་གསར་པས་སྨིན་པར་བྱས་པ་ལས་མཁྲང་འགྱུར་དུ་གྱུར་པ་ནི་ཤ་སྐ་ཞིང་མནན་བཟོད་པའོ། །དེ་ཞག་བདུན་སོང་བ་ན་ཡང་རླུང་གསར་བས་སྨིན་པར་བྱས་པ་ལས་རྐང་ལག་འགྱུས་པ་ནི་བརླ་གཉིས་དང་དཔུང་བ་གཉིས་མགོ་པོའི་མཚན་མ་སྟེ་འབུར་པོ་ལྔ་གསལ་བར་དོད་པ་སྟེ་མངལ་གྱི་གནས་སྐབས་ལྔར་རྣམ་གཞག་རིམ་པར་གསུངས་ལ། མཛོད་འགྲེལ་དང༌། ལུང་གི་མངལ་འཇུག་ལས། ནུར་ནུར་པོ་དང༌། མེར་མེར་པོ་དང༌། ཕྱི་མ་གསུམ་སྔར་བཞིན་དུ་བཤད་ཅིང༌། སའི་དངོས་གཞི་ལས་དེ་གཉིས་ལྡོག་སྟེ་བཤད་ཀྱང་མིང་འདོགས་ཀྱི་རིམ་པ་མི་འདྲ་བ་ཙམ་མ་གཏོས་དོན་ལ་འགལ་བ་མེད་པར་གསུང༌།
བདུན་ཕྲག་བཞི་པའི་ཁམས་སུ་ཐིག་ལེ་དཀར་དམར་རྣམས་དྭངས་སྙིགས་ཕྱེ་ནས། དཀར་པོ་ལས་ནང་དུ་ཁུ་བ་རུས་པ་རྐང་ཏེ་ཕ་ལས་ཐོབ་པའི་མཛོད་གསུམ་དང༌། ཐིག་ལེ་དམར་པོ་ལས་ཕྱི་རུ་ཤ་པགས་པ་ཁྲག་སྟེ་མ་ལས་ཐོབ་པའི་མཛོད་གསུམ་འབྱུང༌། རྣམ་ཤེས་ཐོག་མར་གང་དུ་ཞུགས་པའི་ཁུ་ཁྲག་གི་གནས་དེ་ཕྱིས་སྙིང་གར་འགྱུར་བའི་དེར་ཤིན་ཏུ་ཕྲ་བའི་རླུང་སེམས་གཉིས་དང༌། ཁུ་ཁྲག་གི་དྭངས་མ་གཉིས་ཏེ་བཞི་འདུས་པའི་གོང་བུ་ཡུངས་ཀར་སྦོམ་པོའི་ཚད་ཙམ་པ་དེའི་དབུས་སུ་འཐུམས་ནས་རྩ་དབུ་མ་གསུམ་དང༌། གཡས་གཡོན་དུ་རྩ་རོ་རྐྱང་གཉིས་ཀྱིས་དབུ་མ་ལ་ལན་གསུམ་གསུམ་གྱིས་དཀྲིས་པ་ཆགས། དེ་ནས་གྱེན་རྒྱུའི་རླུང་ཡར་སྐྱེ་ཐུར་སེལ་གྱི་རླུང་མར་སོང་བའི་སྟོབས་ཀྱིས་རོ་རྐྱང་དབུ་མ་གསུམ་ཡར་མར་དུ་གྱེས་ཏེ། མགོ་མཇུག་གཉིས་ཕྲ་ལ་དབུས་སྦོམ་པ་ཉའི་དབྱིབས་ལྟ་བུ་འབྱུང༌། དེ་ནས་རིམ་གྱིས་འབུར་བོར་ལྔ་དང་དེ་རྗེས་ཡན་ལག་ལྔ་དང༌། དེའི་འོག་ཏུ་སྐྲ་དང་སེན་མོ་དང་བ་སྤུ་ལ་སོགས་པ་དང་དབང་པོ་གཟུགས་ཅན་པ་རྣམས་དང༌། ཕོ་མོའི་མཚན་མ་དང༌། ཁ་ནས་རྒྱུ་བའི་དབུགས་རླུང་དང༌། བྱེད་པ་ལྕེ་རྐན་ལ་སོགས་པའི་ངག་གི་གནས་བརྒྱད། ཡིད་ཤེས་ཡུལ་ལ་གཡོ་བའི་དྲན་པ་རྫོགས་པ་རྣམས་རིམ་བཞིན་འབྱུང་བར་འགྱུར་རོ། །
དེ་ལྟར་མངལ་ཆགས་ནས་བུ་ཡིན་ན་མའི་གློ་གཡས་སུ་ཁ་རྒྱབ་ངོས་སྒལ་གཞུང་ལ་ཕྱོགས་ཏེ་ཙོག་པུ་དང༌། བུ་མོ་ཡིན་ན་མའི་གློ་གཡོན་དུ་ཁ་མདུན་ངོས་སུ་ཕྱོགས་ཏེ་ཙོག་པུར་པའི་ཁ་ཐུར་དུ་ལྟ་བ་ཞེས་བྱ་བའི་རླུང་ལངས་ནས། མངལ་གྱི་སེམས་ཅན་མགོ་ཐུར་དང་རྐང་པ་གྱེན་དུ་བསྟན་པ་དྲི་ཆུའི་ལམ་དུ་ཕུལ་བར་བྱེད་དེ་བདུན་ཕྲག་སོ་བརྒྱད་པའི་མཐར་ཕྱིར་ཐོན་ནས་ཐ་མལ་པའི་མིག་ལམ་དུ་གྱུར་ཏེ།བྱིས་པ། གཞོན་ནུ། དར་བབ། དར་ཡོལ། རྒས་པ་སྟེ་བཙས་པའི་གནས་སྐབས་ལྔ་པོ་རིམ་གྱིས་འབྱུང་བ་ཡིན་ནོ།

Next: Formation of channels, winds, and drops
Up a level: Tantra